Jen fine la dua parto pri impresoj kaj spertoj de meksikanoj, kiuj partoprenis en la dumonata virtuala kurso de UEA, TEJO kaj KEL.
Ĝuu la legadon!
----------------------
Abigail Flores, gimnazia studento. Ĉefurbo de Meksiko
Antaŭ nelonge mi eltrovis Esperanton danke al Víctor Sombra, kiu invitis min aliĝi al la kurso kaj, post mia partopreno en ĝi, mi povas diri ke ĝi estis bonega projekto.
Miaj instruistoj, Víctor Sombra kaj Araceli Aguilar, helpis min forigi dubojn, ĉiam estis atentemaj kaj paciencaj kun la gelernantoj, do mi tre dankas ilin pro ĉio, kion ili faris kaj, kompreneble, mi ankaŭ dankas al organizantoj, ĉefe al Doniben Jiménez kaj Moisés Herrera pro ilia atentemo kaj konstanta kunlaboremo.
Tial mi fine venis al konkludo ke Esperanto estas bona afero en ĉiu senso; eĉ por renkonti bonajn homojn tra la mondo!
Alexa Hidalgo, biologo. Ĉefurbo de Meksiko
Komence mi opiniis, ke estas iom hasteme lerni lingvon en tiom malmulte da tempo kaj lecionoj, tamen, la programo estis bone strukturita, la instruistoj regis la temojn, solvis dubojn, dividis materialon kaj estis afablaj, tial la kurso iĝis pli interagiga kaj facila.
Krome mi ŝatis la fakton ke ni havis malsaman instruiston ĉiun semajnon, ĉar ĉiu el ili aldonis ion alian kaj kontribuis diversmaniere en la instru-lernado, sed la plej bona afero estis, ke ni povis praktiki la teorion kaj lernitaĵojn.
Carlos E. Lobato G., universitata instruisto. Villa Hermosa, Tabasco.
Mi havis tre agrablan sperton partoprenante la kurson, mi ŝategis renkonti tiom da homoj, kiuj interesiĝas pri Esperanto, ĉefe ĉar ĝis nun mi trovis neniun en mia ĉiurkauaĵo por praktiki la lingvon, tial mi sentis min foje izolita.
Komence de la kurso mi jam havis antaŭkonojn pri la lingvo, pro tio mi konsideras ke ĝi estis bone strukturita, kvazaŭ planita por mi.
La interagado kun la instuistoj forigis multajn el miaj duboj, ekzemple, pri korelativoj, tikla temo ĉu ne?, krome oni proviziis al ni plurajn aŭdvidajn materialojn, platformojn, esplorendajn librojn kaj instigis nin tiel malkrovi la vastan Esperantan mondon.
Do la partopreno en la kurso donis al mi pli da emo daŭrigi la lernadon ekzemple per lernu, la zagreban metodon, kiun mi tre ŝatis kaj ekkonis danke al retpaĝo de instruisto Enrique Ellenberg, mi legas rekomenditajn verkojn, aliĝis al grupoj de Whats app kaj Telegram, ktp.
Bone estas ke ni, ekskursanoj daŭrigas kontakton, tamen eĉ se ni nun estas komencintoj, mi opinias ke ankoraŭ mankas al ni ian plian gvidon por plene enmiksiĝi en la movadon.
Yair Reyes, kuiristo. Ĉefurbo de Meksiko
Mi ege rekomendas la kurson de Esperanto por hispanparolantoj, estas nekredeble kiel oni kapablas paroli la lingvon ĝuste kaj strukturite en nur du monatoj!
La kurso superis miajn atendojn, do mi estas kontenta kaj impresita pro la rezultoj, tial mi povas aserti ke, sendube, tiu estas la plej bona investo de tempo kaj peno, kiun mi faris en la lastaj monatoj.
Geovani Ruiz M., historiisto-instruisto. Guadalajara, Jalisco.
Miaj impresoj pri la kurso estas tre bonaj, ĝi estis bone organizita, la instruistoj ĉiam akompanis min dum la lernado, respondis miajn demandojn, la klasoj estis interesaj kaj tiam mi havis la eblon paroli kaj amikiĝi kun esperantistoj de la tuta amerika kontinento. Mi ne havas sufiĉe da vortoj por esprimi mian dankemon al organizantoj kaj instruistoj ĉar pere de tiu ĉi kurso mi povis lerni pli pri la lingvo en malmulte da tempo kompare kun aliaj antaŭaj prenitaj kursoj.
J. César Sánchez P., civila inĝeniero. Salamanca Guanajuato.
Miaj impresoj pri la kurso estas sufiĉe bonaj; unue ĉar ĝi okazis per la reto, tial ĝi estis iel pionira kaj tio partoprenigis homojn de foraj lokoj, eĉ de ekster la kontinento.
Mi tre ĝojis renkonti kunlernantojn kaj instruistojn el Latinameriko, kaj speciale mi ege dankans al tiuj ĉi lastaj pro ilia vasta laboro kaj kontribuo en la lernado de Esperanto de la gelernantoj.
Nun, kaj kun la jam akiritaj scioj en la kurso, mi havas novajn fortojn por plu lerni ĉi tiun mirindan lingvon.
Nur restas al mi inviti vin kune vivigadi Esperanton!
Diana G. Valdovinos N., gimnazia studento. Acapulco, Guerrero
Dum tiuj du monatoj mi lernis la bazon de Esperanto por atingi B1-nivelon. Ju pli da klasoj mi havis, des pli mi kapablis kompreni la lingvon.
La instruistoj instigis nin partopreni diversajn virtualajn agadojn eksterklase, do mi tion faris kaj mi agrable surpriziĝis kiam, dum konferenco pri edukado en Barato, mi komprenis preskaŭ ĉion, povis starigi demandojn kaj komunikiĝi kun homoj de la alia flanko de la mondo.
Unu el la plej valoraj aferoj de la kurso por mi estas, ke dume mi renkontis multajn homojn, tial mi povas daŭre praktiki la lingvon eĉ kiam la kurso finiĝis.
…………………..
* En la bildo aperas instruistoj kaj lernantoj de la kurso, kiuj ne nepre korespondas al homoj, kiuj sendis tekstojn publikigitaj ĉi tie.
Español
Esperanto
Nun ni publikigas informojn pri impresoj kaj spertoj de kelkaj meksikanoj, kiuj partoprenis kiel lernantoj en reta kurso lanĉita de Universala Esperanto Asocio, Tutmonda Esperantista Junulara Organizo kaj Kolombia Esperanto Ligo. Ĝi okazis inter la 29a de junio kaj 22a de aŭgusto kaj indas mencii ke tiun kurson finis entute 68 homoj el Meksiko, ni tre ĝojas pro tio kaj speciale ni ege dankas tiujn 14 homojn, kiuj sendis al ni sian tekston por publikigo.