Esperanta renkontiĝo en Querétaro: impresoj pri la Ea-klubo kaj la urbo!*

Ĉi tiun semajnfinon mi ekkonis tutfreŝan Esperanto-klubon en la meksika urbo Querétaro. Estis renkontiĝo kiu vere inspiris kaj motivigis min sekvi kun la, kelkfoje, malfacila laboro disvastigi Esperanton.

Vendrede dum la vespero grupo de pli malpli 10 junuloj atendis min en trinkejo en la belega historia centro de Querétaro. Ilia instruisto, Sergio Romero, kiu ankaŭ laboras en la ŝtata universitato kiel profesoro de la portugala lingvo, ekinstruis Esperanton volontule dum la lasta jarkvarono. Li estas tre feliĉa, ĉar finfine li povas paroli Esperanton kun aliaj homoj en la urbo. Mi estis ege surprizita, ĉar la lernantoj vere jam sufiĉe bone parolas por povi babili la tutan nokton en Esperanto pri diversaj temoj.

Dum la nokto ni promenis tra la urbo, estis vendredo kaj multaj homoj estis sur la stratoj. En la placoj okazis koncertoj kaj la trinkejoj estis plenplenaj. Ni manĝis en eta vendejo flanke de la strato kaj mi gustumis meksikajn specialaĵojn kiel ‘tamales’ kaj ‘buñuelos’ kiuj estis bongustegaj! “Tamal” estas miksaĵo de kokino kaj maizo en folio de banano kaj buñuelos estas dolĉaĵo, sed mi ankoraŭ ne divenis la ingrediencojn.

Ni interkonsentis renkontiĝi denove la venontan tagon por ekkoni la urbon dum la tago. Du el ili pretis gvidi min kaj ni havis amuzan sed sufiĉe lacigan tagon kune. Ni promenis tra la tuta urbo kaj vizitis la parkon kie oni mortigis Maksimilianon de Habsburgo en la jaro 1867. Mi ĉefe ŝatis la ŝtonojn tie, ĉar se vi batas ilin per alia ŝtono ili faras sonon kiel sonoriloj! Sekve ni promenis al la alia flanko de la urbo por viziti la preĝejon de la Sankta Kruco, kie stranga arbo mirakle havas dornojn en formo de la kruco de Jesuo.

Ni finis la tagon ripozante kun bongustega ‘michelada’, alia specialiaĵo de Meksiko, temas pri biero miksita kun ruĝa pipro kaj citrono.
Estis bonega semajnfino, ankaŭ por ili, ĉar estis la unua fojo ke ili povis paroli kun eksterlandano en Esperanto, kaj tio fakte estas la celo de Esperanto.

Mi certas ke ni ankoraŭ aŭdos pri la Esperantistoj de Querétaro!

* Verkita de Anneleen Nys.

Categorías: