Per esperanto ni lernis iom pri la korea kulturo*

Kadre de la konversaciaj rondoj planitaj por la jaro 2017 en la ĉefurbo de Meksiko kaj en la ankau meksika urbo San Luis Potosí, la organizintoj kunvenigis homojn interesitaj pri la korea kulturo kaj/aŭ pri esperanto en la sama loko. La ĉeestintoj havis la okazon ĝui diversajn aktivecojn rilate al la renkontiĝa temo.

En San Luis Potosí la unua interkultura renkontiĝo per esperanto nomita “Gustumeto de Koreio” okazis la 26an de januaro en la Casa Intercultural de Lenguas y Arte. Post prezento de la celoj de la renkontiĝo la partoprenintoj sekvis instrukciojn en esperanto, helpe de gestoj kaj de la hispana lingvo, por prepari du koreajn receptojn: Ramyeon kaj Bibimbap.

Fininte la plimulton de la ingrediencpreparado, instruistino Shin Eun Sook (Ana Sonĝanta), el Suda Koreio, gaje donacis al la ĉeestintoj iom da tempo por interparoli kun ili pri sia laboro por Esperanto, pri la novjarfestoj en niaj landoj kaj pri sia agado en alternativa edukado kune kun la Internacia Lingvo. Por koni pli pri ŝiaj spertoj vizitu: www.songhanta.blogspot.kr

Dum la atendo de kuirado, Yarely Cárcamo, lernanto de Esperanto en la Casa, montris al la partoprenintoj kiel skribi kelkajn vortojn en la korea lingvo, tiel kiel la ingrediencojn de la manĝotaj pladoj por ĉi tiu tago. Estis ankaŭ eble por ili vidi kiel Esperanto helpas kompreni la skribon de ĉi tiu azia lingvo. Post tio kaj post finkuirado, en kiu multe helpis Carmen Rosillo, Yarely, Yehosu'a Pérez kaj David López, finfine ĉiuj kune povis gustumi la koreajn manĝajojn. Kompreneble ni babiladis kaj en esperanto kaj en la hispana dum la diversaj etapoj de la renkontiĝo sed ĉefe dum la manĝado.

Ni dankas ĉiujn kunlaborintojn, partoprenintojn kaj ĉiujn, kiuj helpis realigi ĉi tiun unuan interkulturan eventon en San Luis Potosí. Grandajn dankojn al Ermito el Koreio, kiu sendis siajn salutojn al nia klubo, al Korea Esperanto Asocio por helpi konektiĝi kun li kaj Ana Sonĝanta, al Ana Velasco el la meksika ĉefurbo pro la iniciato organizi ĉi tiujn konversaciajn rondojn kaj al Meksika Esperanto Federacio pro la subteno, publikigo kaj diskonigo de chi tiujn eventojn.

Ni atendas vin kore por ĝui la duan en februaro. Restu atentaj al la invito!

Verkis: David López R.

Categorías: